1 Corinthians 12
Xaixai Iouiou Noxou Uleenu Tavuna
1Ta vivilo eni emasaxa lexe ngingi ngalavusou xavi iouiou sou i'oxo xaixai noxou Uleenu Tavuna. 2 aLa sou ngingi ngalavu lexe no mine ngingi ngexolu loxo ta mitema ane imulaxu tane'i noxou Iesu uasi, la mii vile ulapungengi ngalai noxi'a ta lataua kalakalavoi ane ivivikala uasi ne la ngingi ngalaisi. 3 bAloxo ne la sou eni avikalangengi lexe vile noxinge ne Uleenu Lataua uxolu noxou la umomomo sou ulevetesou Iesu uasi. Mo lexe vile noxinge Uleenu Tavuna uxolu noxou la umomomosou uvikala lexe, “Iesu ne Anu Tila,” uasi.4 cUleenu Tavuna ulosou xavi iouiou sou u'oxonu xaixai, ia anu Uleenu Vilesisi. 5Mo xaixai iouiou kalumo, ia anu Tila vilesisi. 6Lataua anusisi mulosi 'a ta mitema ukalusi xaixai iouiou, ia anu molu ulosi'a xavi sou i'oxonu. 7No 'a xaixai vilevilesi la Uleenu Tavuna ulosi'a ta mitema xavi mo sou isu'uline'i se'i. 8Io Uleenu Tavuna iouvilesisi nesi a ulosou itema vile xavi sou uvivikala no 'a xavutala laixe xe noxou itema vile la ulosou xavi sou uvivikala no 'a lavulavu laixe. 9Uleenu iouvilesisi nesi ulosou itema xavi sou ulavusou umulamulaxu tanu noxou Iesu, mo ulosou vile xavi sou ukilakasi'a ta mitema la imauli la. 10Xe vile sou umaxa'u sosovo sou xavi, mo vile sou ua'alo palomatana, xe vile sou uilevine'i ta uleenu, mo vile sou uvikala no anu vaikala iouiou xe vile sou uxiunu vaikalau ane uvivikala no anu vaikala iouiou. 11 dXe xaixai mukalusi ne anu xaixaiou Uleenu iouvilesisi. Ia Anu mulosi'a vilevilesi loxo no anu masaxa noxousi.
Vasimolu Vile ne Anu Lololisi Ia Vilevilesi ne Mixali Piena no Anu
12 eVasimolu vile ne anu lololisi ia piena muxali no anu. Mo vilevilesi ne piena ia ane'i ixalixu vasimolu vilesisi. La sou noxou Kalisito ne anu aloxo nesi. 13 fXo nenge mukalusi ne te'ulo no anu Uleenu vilesisi sou te'una no anu vasimolu vilesisi. Nenge ta Iutaia mo nenge ta Xiliki xe nenge ta mitema sou ipalupalusinge mo ta mitema ane evile usakisaki uasi. La sou nenge mukalusi ne teno'u Uleenu vilesisi sou taiexu.14Ioxe la sou vasimolu vile ne piena ia uxalixu vilesisi uasi. 15Lexe tava'u uvikala lexe, “Eni avolu uasi, la sou eni noxou vasimolu ne uasi,” la anu umomomo sou tava'u ne utolosou sou uxolu loxo vile no anu vasimolu ne kalumo. 16Mo lexe sangalou uvikala lexe, “Eni iou uasi la sou eni noxou vasimolu ne uasi,” la anu umomomo sou sangalou ne utolosou sou uxolu loxo vile no anu vasimolu ne kalumo. 17La sou lexe vasimolu lololi ne iousi la sou anu ulomu a loxovaa? Lexe vasimolu lololi ne anu sangalousi la sou anu utuma a loxovaa? 18Ia maninasou. Lataua mumuxaxu vasimolu vilevilesi ne no nano no anu vasimolu vile aloxo anu mumasaxau sou uxali. 19Lexe ane'i ukalusi ne ixali loxo iouvilesisi la sou vasimolu ne uxolu a ne'ei? 20Anu aloxo ne la sou pa'upa'usou ne piena ia vasimolu ne vilesisi.
21Mo iou ne umomomo sou uvikala ulai noxou avolu lexe, “Eni emomomo io amasaxaine uasi,” uasi. Xe kisou ne umomomo sou uvikala ulai noxou tava'u lexe, “Eni emomomo io a masaxaine uasi,” uasi. 22Xo anu aloxo 'o, vasimolu pa'upa'usou ane loxo mamalaxa'a si ne anu umomomo sou ane'i ixexee uasi. 23Xe pa'upa'usinge ane nenge taxavutala lexe tatoxone'i malaxo uasi ne nenge tatoxone'i laixe. Xe vasimenge pa'upa'usou ane laixe umomomo sou tamaxa'u uasi ne nenge tatalumeu laixe, 24io pa'upa'usinge ane'i ipala'a ne tatalumeiei laixe uasi. Ia Lataua mupitanu vasimolu pa'upa'usou la muitalonu sou tatoxonu tatila mulai no anu pa'upa'usou ane uxolu vitanisi. 25Anu aloxo ne mo sou kalikalipalaa uxali no nano no 'a vasimolu ne mamu, ia lexe pa'upa'usou ne xavutalane'i ne umomomo sou usaxila'a ngatongato'osi. 26Lexe pa'usou vile uno'u navunavu, la pa'upa'usou ukalusi ne ilo'a ino'u navunavu. Mo lexe pa'usou vile uno'u tooxu, la pa'upa'usou ukalusi ne ilo'a i'osa.
27 gIoxe ngingi ne vasimolu Kalisito, mo ngingi vilevilesi ne anu vasimolu pa'upa'usou. 28 hXe no nano no anu ta mitema ilotu noxou Iesu la Lataua musosovosi'a ta mitema ane Iesu mupalusi'a, xe tameisou ane ta mitema sou palomatana, xe tatalusou ane ta mitema sou ilosinge lavulavu, xe ta mitema sou i'oxonu sosovo iouiou, xe ane'i ane ino'u xavi sou i'oxone'i ta mitema ixali laixe, xe ane'i ane sou su'uli, xe ane'i ane ino'u xavi sou iulaxunu xaixai, xe kaluxusou ane'i ane ivikala no anu vaikala iouvilemo. 29Loxovaa, ane'i mukalusi ne ane'i ta mitema ane Iesu mupalusi'a? Ane'i mukalusi ne ta mitema sou palomatana? Mo ane'i mukalusi ne ta mitema sou ilosinge lavulavu? Loxovaa ane'i mukalusi ne i'oxonu sosovo iouiou? 30Mo loxovaa, ane'i mukalusi ne mino'u xavi sou pamauli i'oxone'i ta mitema ixali laixe? Loxovaa, ane'i mukalusi ne ivikala no anu vaikala iouiou? Loxovaa ane'i mukalusi ne ixiunu vaikala iouvilemo ne? Uasi Lataua musosovosi'a vilevilesi sou i'oxo xaixai ane ne. 31 iIa ngingi ngamasaxau xavi sou xaixai lailaixe vaimomo 'o ne u'oki.
Copyright information for
ATA